Totale Heupvervanging

Wat is 'n totale heupvervanging?

  • Dit is 'n chirurgiese prosedure waar die aangetaste kraakbeen en been van 'n heupgewrig vervang word met 'n heupgewrigsprostese (kunsmatige heupkomponente)
  • Die heuppotjie word vervang met 'n kunsmatige potjie.
  • Die kop aan die bopunt van die femur word verwyder en vervang met 'n metaalskag en -kop wat in die holte van die femur geplaas word.
  • Die kunsmatige potjie word die asetabulêre prostese genoem en die metaalskag en -kop word die femorale prostese genoem.
  • Heupvervangings kan òf gesementeer òf ongesementeer wees.
  • In gesementeerde heupvervangings word die asetabulêre en femorale prostese aan die beenoppervlaktes geheg met 'n beensement genaamd metielmetakrylaat.
  • In ongesementeerde heupvervangings het die asetabulêre en femorale prostese mikroskopiese porieë wat die omliggende been toelaat om op die prostese te groei.
  • U chirurg sal die voor- en nadele van gesementeerde en ongesementeerde prostese met u bespreek.

Wie is 'n kandidaat vir Totale Heupvervanging Chirurgie?

  • Die mees algemene aanduiding vir 'n totale heupvervanging is osteoartritis van die heup wat toenemende heuppyn asook verlies aan lewensgehalte veroorsaak.
  • Osteoartritis (gewrigsrumatiek) van die heup kan geassosieer word met ouderdom of genetika - dit staan bekend as primêre osteoartritis
  • Osteoartritis (OA) kan ook sekondêr deur ander toestande veroorsaak word:
    • Post-traumatiese OA
    • Kongenitale abnormaliteite van die heup, bv. Verskuifde boonste femorale epifise (skagpunt)
    • Avaskulêre nekrose van die heup as gevolg van die verlies aan bloedtoevoer na die heup
    • Inflammatoriese artritis, bv. Rumatoïede- of Psoriatiese artritis
    • Infeksies bv. Tuberkulose
* As heuppyn die pasiënt se lewenskwaliteit beïnvloed (nagpyne, pyn wat eenvoudige daaglikse aktiwiteite verhinder), word die pasiënt 'n kandidaat vir 'n totale heupvervanging.
* Sodra 'n pasiënt 'n kandidaat is vir 'n heupvervanging, word sorgvuldige oorweging gegee aan mediese toestande (soos hart- en longkwale) om te verseker dat die operasie veilig is vir die pasiënt.
* 'n Totale heupvervanging is 'n elektiewe prosedure. Die besluit om 'n heupvervanging te doen, is 'n ingeligte besluit waar die chirurg en pasiënt die risiko's en voordele van chirurgie, die chirurgiese prosedure en post-chirurgiese rehabilitasie asook die verwagte langtermyn-uitkoms van die operasie, bespreek.

Wat is die komplikasies by 'n totale heupvervanging?

Komplikasies spesifiek tot heupvervangings:

  • Bloedklonte in die are van die onderste ledemaat (bekend as diepvenatrombose of DVT)
  • Hierdie bloedklonte kan na die longe beweeg, dit staan bekend as 'n Pulmonêre Embolisme of PE. Alhoewel seldsaam, kan 'n PE asemnood en dood veroorsaak.
  • Heupontwrigting (onstabiliteit)
  • Verskil in beenlengtes
  • Heupsenuwee beserings - dit kan 'n hangvoet tot gevolg hê.
  • Infeksies (oppervlakkige wondinfeksie of diepliggende infeksie wat betrekking het op die heupvervanging.)
  • Littekens en beperking van die omvang van beweging van die heup.
  • Aanhoudende pyn ten spyte van die heupvervanging
  • Heterotopiese ossifikasie - nuwe beenvorming in die spiere rondom die heup.
  • Losgaan van heupvervanging
  • Bloeding
  • Narkoseverwante komplikasies soos hart-aritmieë, beroerte, lewertoksisiteit, longontsteking en dood.

Watter voorbereiding is nodig vir die prosedure?

Die preoperatiewe evaluering bevat gewoonlik 'n oorsig van alle medikasie wat deur die pasiënt geneem word. Anti-inflammatoriese medisyne, insluitende aspirien, word dikwels een week voor chirurgie gestaak weens die effek van hierdie medikasie op bloedplaatjiefunksies en bloedstolling. Ander preoperatiewe evaluasies sluit in, volledige bloedtellings, elektroliete (kalium, natrium, chloried), bloedtoetse vir nier- en lewerfunksies, urinalise, bors X-straal, EKG, MRSA- (Metisillien-Resistente Stafilokokkus Oureus) -sifting en 'n fisiese ondersoek. U dokter sal bepaal watter van hierdie toetse benodig word, gebaseer op u ouderdom en mediese toestande. Enige aanduidings van infeksie, ernstige hart- of longkwale of aktiewe metaboliese steurnisse soos onbeheerde diabetes, kan daartoe lei dat die totale heupgewrig-operasie uitgestel of die proses vertraag word.

Totale heupgewrigvervanging kan bloedverlies tot gevolg hê. Pasiënte wat beplan om 'n totale heupvervanging te ondergaan, sal dikwels hul eie (outoloë) bloed skenk vir transfusie tydens die operasie. Indien 'n bloedoortapping benodig word, sal die pasiënt die voordeel hê dat sy of haar eie bloed beskikbaar is, en sodoende die risiko's verbonde aan 'n bloedoortapping verminder.

Oortollige liggaamsgewig kan 'n risikofaktor wees vir infeksie, verhoogde intra-operatiewe bloedverlies, diepvenatrombose / pulmonêre embolieë, heupstyfheid en aanhoudende heuppyn na afloop van die operasie. Hierdie pasiënte kan ook 'n baie stadiger postoperatiewe rehabilitasie herstelperiode hê. As dit moontlik is, moet pasiënte met 'n oormaat liggaamsgewig 'n gewigsverliesprogram oorweeg om die risiko's van chirurgie te verminder.

Wat sal herstel vir die pasiënt inhou na afloop van die operasie?

'n Totale heupgewrigvervanging-operasie duur ongeveer twee tot vier uur. Die voorafgaande voorbereiding mag ekstra tyd in beslag neem. Na die operasie word die pasiënt na 'n herstelkamer geneem vir onmiddellike waarneming wat gewoonlik vanaf een tot vier ure duur. By stabilisering word die pasiënt oorgeplaas na 'n hospitaalkamer of intensiewe sorgeenheid. Gedurende die onmiddellike herstelperiode word pasiënte binneaarse vloeistowwe toegedien. Binneaarse vloeistowwe is belangrik om 'n pasiënt se elektrolietbalans te handhaaf en enige vloeistowwe wat tydens die operasie verlore gaan, te vervang. Met dieselfde drup kan antibiotika sowel as pynmedikasie toegedien word. Pasiënte sal ook buise sien wat vloeistof uit die chirurgiese wondplek afvoer. Die hoeveelheid en aard van die dreinering is belangrik vir die dokter en kan noukeurig deur die verpleegster gemonitor word. 'n Wondverband word in die operasiekamer opgesit en moet vir 2 weke in posisie gehou word. Die wondverband sal vroeër vervang word slegs as die wond dra of die verbande loskom.

Pynmedikasie word algemeen toegedien deur middel van 'n pasiënt-beheerde analgesie (PBA)waardeur pasiënte hulle eie dosis medikasie, soos benodig, kan toedien. Pynmedikasie kan soms aanleiding gee tot naarheid en braking. 'n Naarheidteenmiddel kan dan toegedien word.

Maatreëls word getref om bloedklonte in die onderste ledemate te voorkom. Pasiënte sal na die operasie met drukkouse (TED-kouse) voorsien word. Kompressiepompe word dikwels ook gebruik, wat help deur bloedsomloop in die bene te forseer. Pasiënte word aangemoedig om die onderste ledemate aktief te oefen om aarvloei in die onderste ledemate te verhoog en sodoende bloedklonte te voorkom. Medikasie word gegee om die bloed te verdun en sodoende bloedklonte verder te voorkom.

Pasiënte mag ook probleme ondervind met urinering. Hierdie probleem kan 'n newe-effek wees van pynmedikasie. Kateters word gevolglik dikwels in die blaas geplaas om normale urinale vloei te verseker.

Onmiddellik na die operasie word pasiënte aangemoedig om gereelde asemhalingsoefeninge te doen en te hoes om longkongestie, asook die platval van klein lugweë in die longe, te voorkom. Pasiënte kry ook 'n "blaasbottel", waardeur die lugweë oopgehou word deur aktief teen weerstand te blaas.

Feite oor totale heupvervangings

  • Die prostese vir 'n totale heupvervanging (totale heupartroplastiek) kan met of sonder sement in die bekken en femur geplaas word. Die ortopediese chirurg kan die opsies aanpas by elke pasiënt.
  • Chroniese pyn en verswakking van die daaglikse funksie van pasiënte met ernstige heupartritis, is redes waarom behandeling deur totale heupvervanging, oorweeg word.
  • Komplikasies en risiko's van totale heupvervangingsoperasies is geïdentifiseer.
  • Fisioterapie is 'n noodsaaklike deel van rehabilitasie na 'n totale heupvervanging.
  • Dit word meestal aanbeveel dat pasiënte met kunsmatige gewrigte antibiotika neem voor, tydens en na enige elektiewe, indringende prosedure (tandheelkundige werk ingesluit).

Wat behels die rehabilitasieproses na totale heupvervangings?

Na 'n totale heupvervangingsoperasie, begin pasiënte dikwels onmiddellik met fisioterapie. Op die eerste dag na die operasie is dit algemeen om met minimale fisioterapie te begin terwyl u in 'n stoel sit. Uiteindelik behels rehabilitasie aksies soos trap, stap en klim. Aanvanklik word ondersteunende toestelle soos 'n loopraam of krukke gebruik. Pasiënte is gewoonlik binne 3-5 dae na die operasie tuis. By ontslag moet die pasiënt onafhanklik kan mobiliseer met 'n loopapparaat.

Fisioterapie speel 'n uiters belangrike rol in die algehele resultaat van enige gewrigsvervangingsoperasie. Die doel van fisioterapie is om kontrakture te voorkom, pasiëntvoorligting te verbeter en spiere rondom die heupgewrig te versterk deur gekontroleerde oefeninge.

Kontrakture wat die beweging van die gewrig kan beperk, kan veroorsaak word deur littekens van die weefsel rondom die gewrig. Kontrakture laat nie 'n volledige omvang van bewegings toe nie en belemmer dus die beweeglikheid van die vervangde gewrig. Pasiënte word aangeraai om nie die heupgewrig te ooreis deur swaar gewigte op te tel of deur ander ongewone aktiwiteite tuis nie.

Spesifieke tegnieke vir postuur en sitposisie asook die gebruik van 'n verhoogde toiletstoeltjie, kan baie nuttig wees. Pasiënte word aangesê om nie die geopereerde, onderste ledemate oor die middellyn van die liggaam te kruis nie (om nie die been oor die ander been te kruis nie) weens die risiko dat die vervangde gewrig ontwrig word. Hulle word ontmoedig om die middellyf te buig en word aangemoedig om 'n kussing tussen die bene te gebruik as hulle op die nie-geopereerde kant lê, om te verhoed dat die geopereerde, onderste ledemaat oor die middellyn kruis. Pasiënte kry tuisoefenprogramme om die spiere rondom die boud en dy te versterk. Die meeste pasiënte ontvang buitepasiënt-fisioterapie terwyl hulle gereelde tuisoefeninge in hul daaglikse lewe inkorporeer.

Watter ander postoperatiewe instruksies word gegee aan pasiënte met totale heupgewrigvervangings?

Pasiënte sal voortgaan om ondersteunende apparate te gebruik soos gemonitor en aanbeveel deur die terapeut en behandelende geneesheer. Medisyne sal waarskynlik gegee word om bloedklonte in die bene verder te voorkom. Dit sluit inspuitings met Aspirin, Xarelto of Clexane in. Dit is belangrik om daarop te let dat pasiënte die risiko loop om bloedklonte te ontwikkel vir so lank as 6-12 weke na die operasie.

Pasiënte sal geleidelik meer selfvertroue kry en minder afhanklik wees van ondersteunende apparate. Pasiënte word aangeraai om op te let vir tekens van infeksie, insluitend swelling, hitte, rooiheid, of verhoogde pyn in of rondom die chirurgiese plek. Die pasiënt moet die dokter se kantoor onmiddellik in kennis stel indien hierdie veranderinge opgemerk word of as daar 'n besering aan die heup is. Die hegtings, wat meestal krammetjies is, word 2 weke na die operasie verwyder.

Met hospitaal ontslag, sal u afsprake hê vir 'n fisioterapie opvolgbesoek, 'n besoek aan die wondsuster (gewoonlik twee weke na die operasie) en 'n besoek aan Dr CT Solomon. Ons sal u op hoogte hou van al die tersaaklike afsprake.

Neem asseblief kennis dat u baie welkom is om enige tyd die kamers te kontak indien u enige vrae of bekommernisse het.

Wat is die prognose van totale heupvervangings?

Pasiëntvoorligting is belangrik om die lewensduur van die vervangde heup te verseker. Veeleisende oefening soos hardloop of enige kontaksport word ontmoedig omdat hierdie aktiwiteite die vervangde heup kan beseer. Swem is ideaal om spierkrag te verbeter en mobiliteit en uithouvermoë te bevorder.

Pasiënte moet daarop let om enige versorgers in kennis te stel dat hulle 'n kunsmatige gewrig het. Antibiotika word aanbeveel tydens enige indringende prosedure, hetsy chirurgies, urologies, gastro-enterologies of tandheelkundig. Infeksie elders in die liggaam moet ook behandel word om te voorkom dat sulke infeksie na die gewrig versprei. Dit is belangrik omdat bakterieë deur die bloedstroom vanaf hierdie areas na die heupprostese kan versprei en besmetting kan veroorsaak.

Heupgewrigsoperasies is een van die mees suksesvolle gewrigsoperasies wat vandag uitgevoer word. By goed geselekteerde pasiënte, wat geskikte kandidate is vir totale heupvervangings, hou die prosedure, in meeste gevalle, ten minste 15 jaar. Langtermynresultate verbeter op indrukwekkende wyse met behulp van nuwe toestelle en tegnieke. Nuwe tegnieke sal in die toekoms verder bydra om uitkomste asook mobiliteit van pasiënte te verbeter en die risiko vir komplikasies te verminder.

Mediese Vrywaring

Die inligting op hierdie webwerf is nie bedoel om 'n plaasvervanger vir professionele mediese advies, diagnose of behandeling te wees nie. Alle inhoud, insluitende teks, grafika, beelde en inligting, wat op hierdie webwerf vervat word of beskikbaar gestel word, is slegs vir inligtingsdoeleindes. Ons maak geen voorstellings nie en aanvaar geen verantwoordelikheid vir die akkuraatheid van inligting wat op hierdie webwerf vervat word of beskikbaar gestel word nie. Hierdie inligting is onderhewig aan verandering sonder kennisgewing. U word aangemoedig om enige inligting wat vanaf of deur hierdie webwerf verkry word met ander bronne te verifieer en om alle inligting rakende enige mediese toestand of behandeling met u dokter te bevestig. MOET NOOIT PROFESSIONELE MEDIESE ADVIES VERONTAGSAAM OF NALAAT OM MEDIESE BEHANDELING TE VERKRY AS GEVOLG VAN INLIGITNG WAT U VANAF OF DEUR HIERDIE WEBWERF INGEWIN HET NIE.

Dr. CT SOLOMON

FCS (Orth) SA, MBChB (Stell),
Bsc (hons) (Sport Med)

Pr. No. 0760897

Ons Adres

Suite 209 Cape Gate Medi Kliniek,
C/O Okavango & Tanner Pad,
7560, Brackenfell,
Kaapstad

Kontak Ons

Tel: 021 981 4666
Faks: 086 506 0727
Noodgevalle: 021 983 5911
TOP